Ministè Jistis ak Sekirite Piblik (MJSP) ap fè popilasyon an konnen, jan lalwa ba l misyon pou l fè sa, li mande otorite nan Lapolis pou yo adopte yon plan sekirite pandan fèt fendane yo. Plan sa a ap aplike konsa :

1. Lapolis ap prezan sou tout gran wout yo, ak kote ki gen anpil moun, yon mannyè pou pèmèt popilasyon sikile lib e libè nan sou teritwa a ;

2. Lapolis ap prezan tout kote ki gen gwo rasanbleman moun pandan sezon fèt la ;

3. Lapolis ap kontinye mennen operasyon pou desitire tout gang k ap simaye lapenn ak dèy nan sosyete a ;

4. Fòs polis yo ap arete tout moun k ap kreye latwoublay, sitou sila yo ki enplike nan kidnapin, epi libere tout otaj ki nan men bandi ;

Ministè Jistis ak Sekirite Piblik konte sou devouman tout Lapolis la pou yo fè respekte dispozisyon sa yo san paspouki.

Ministè Jistis ak Sekirite Piblik pwofite mande popilasyon an pou l kolabore san rezèv ak Lapolis la pou kreye yon klima lapè ak sekirite nan tout rakwen nan peyi a.